प्रहर खबर
 २०८१ बैशाख ५, बुधबार    

फोनिज मधेश प्रदेशले बुझायो नेपाल पत्रकार महासंघ मधेश प्रदेशमा सात दिने अल्टिमेटम पत्र

२०८० फाल्गुन १५, मंगलबार २०:२७ बजे

कलैया – लामो समय देखि नेपाल आदिवासी जनवाती पत्रकार महासंघ (फोनिज) ले नेपाल पत्रकार महासंघको संस्थापक अध्यक्षको गलत इतिहासलाई हाल सम्म नसच्याएकाले गलत इतिहास सच्याउन माग गर्दै मंगलबार देशभरका नेपाल पत्रकार महासंघको शाखाहरु मार्फत केन्द्रीय समितिलाई ७ दिने अल्टिमेटम तथा स्मरण पत्र हस्तान्तरण गर्ने क्रममा फोनिज मधेश प्रदेशले पनि ७ दिने अल्टिमेटम तथा स्मरण पत्र बुझाएको हो ।

फोनिज मधेश प्रदेशका अध्यक्ष दुष्यन्त चौधरीको नेतृत्वमा गएको टोलीले नेपाल पत्रकार महासंघ मधेश प्रदेशका महासचिव श्याम बन्जारालाई संयूक्तरुपमा पत्र बुझाएको हो । पत्र बुझाउँदै फोनिज मधेश प्रदेशका अध्यक्ष चौधरीले पत्र यथाशिघ्र केन्द्रमा पठाउन अनुरोध गर्नुभयो । पत्र बुझ्दै पत्रकार महासंघ मधेश प्रदेशका महासचिव बन्जाराले लगतै केन्द्रमा सो अल्टिमेटम तथा स्मरण पत्र पठाइएको समेत जानकारी दिनुभयो । नेपाल पत्रकार महासंघ मधेश प्रदेशका महासचिव बन्जाराले थप्दै भन्नुभयो , हामी पत्रकार सबैको इतिहास केलाउने हामी आफ्नै इतिहास नै कायम गर्न नसक्नु दुर्भाग्य रहेको जनाउनुभयो ।

वर्तमान नेपाल पत्रकार महासंघको जग तत्कालीन ‘नेपाल पत्रकार संघ’ नै हो । नेपाल पत्रकार संघ गठन गरेर नेपाली पत्रकारलाई पहिलो पटक संगठित गर्ने व्यक्ति सत्यनारायणबहादुर श्रेष्ठ हुनुहुन्थ्यो । विसं २००८ वैशाख ९ गतेको पत्रकार भेलाले सत्यनारायण बहादुर श्रेष्ठको नेतृत्वमा ‘नेपाल पत्रकार संघ’ गठन गरेको थियो । २००९ वैशाख २८ गते श्रेष्ठकै सभापतित्वमा तत्कालीन नेपाल पत्रकार संघ पुनर्गठन भयो । थप पत्रकारलाई संघमा संगठित गर्ने उद्देश्यसाथ संघको पुनर्गठन गरिएको थियो ।

अकाट्य तथ्यहरूका आधारमा हाल नेपाल पत्रकार महासंघ (तत्कालीन नेपाल पत्रकार संघ) को संस्थापक सभापति (हाल अध्यक्ष) सत्यनारायण बहादुर श्रेष्ठ हुनुहुन्थ्यो भन्ने कुराको प्रमाणका रूपमा दस्तावेजहरूले पुष्टि गरिसकेको छ । तर, नेपाल पत्रकार महासंघले अकाट्य तथ्यहरूलाई नजरअन्दाज गर्दै सन्त नेता तथा पूर्वप्रधानमन्त्री कृष्णप्रसाद भट्टराईलाई संस्थापक अध्यक्ष मान्दै आएको छ । महासंघको यो कदमप्रति नेपाल आदिवासी जनजाति पत्रकार महासंघ (फोनिज)ले गम्भीर विमति राख्दै आएको छ ।

वि.सं २०१२ चैत १६ गते नेपाल पत्रकार संघ पुनर्गठित हुँदा कृष्णप्रसाद उपाध्याय भट्टराई सभापति बन्नुभएको तथ्य साँचो हो । उहाँको योगदानको हामी सबैले उच्च कदर गर्नुपर्छ, आदरभाव प्रकट गर्नु पर्दछ ।

यसर्थ, नेपाल पत्रकार महासंघले आफ्ना दस्तावेजहरूमा महासंघको संस्थापक अध्यक्ष कृष्णप्रसाद भट्टराई हुनुहुन्छ भनी उल्लेख गरेका गलत विवरण सच्याएर ‘नेपाल पत्रकार महासंघका संस्थापक अध्यक्ष सत्यनारायण बहादुर श्रेष्ठ हुनुहुन्छ’ भन्ने सही तथ्यलाई स्थापित गराउन यसै ज्ञापनपत्र मार्फत नेपाल पत्रकार महासंघसँग जोड्दार माग गरेका छन् ।

यस भन्दा पहिला पनि फोनिजले २०७९ सालमा नेपाल पत्रकार महासंघ मार्फत ज्ञापन पत्र बुझाइएको थियो । तर इतिहास नसच्याएकाले स्मरणका लागि पुनः बुझाइएको हो । सात दिने अल्टिमेटम तथा स्मरण पत्र बुझाउने क्रममा फोनिज मधेश प्रदेशका सदस्य नबिन चौधरी , शम्भु महतो थारु , फोनिजका सदस्य राम प्रवेश चौधरी , पुनम चौधरी , एन्जल चौधरी लगाएको उपस्थिती रहेको थियो ।