प्रहर खबर
 २०७९ माघ २४, मंगलबार    

समानुपातिक मतगणना अपडेट: एमालेको २५ लाख मत कट्यो, एस थ्रेसहोल्ड कटाउन प्रयासरत

२०७९ मंसिर १२, सोमबार १२:०० बजे

काठमाडौं – हाल प्रतिनिधिसभा तथा प्रदेशसभा समानुपातिकतर्फको मतगणना जारी छ । अहिलेसम्मको मतपरिणाम अनुसार, सबैभन्दा बढी मत नेकपा एमालेले पाएको छ भने बढी सिट पाउने दल बन्ने देखिएको छ ।

सोमबार बिहान १० बजेसम्म ९२ लाख ८९ हजार मत गन्दा एमालेले सबैभन्दा धेरै २५ लाख ३० हजार २१४ मत पाएको छ । यो मत अनुसार एमालेले ३५ सिट पाउने देखिएको छ ।

नेपाली कांग्रेसले समानुपातिकततर्फ २३ लाख ९६ हजार ९३ मत पाएको छ । यस आधारमा कांग्रेसले ३३ सिट पाउने छ ।

राष्ट्रिय स्वतन्त्र पार्टीले १० लाख ६२ हजार ९८० र माओवादी केन्द्र १० लाख ६१ हजार २०० मत पाएका छन् । यस आधारमा दुवै दलले समान १५/१५ सिट पाउने देखिन्छ ।

त्यसपछि राष्ट्रिय प्रजातन्त्र पार्टीले ८ र जनता समाजवादी पार्टी, नेपालले ४ सिट पाउने सम्भावना छ । राप्रपाले ५ लाख ४५ हजार १८८ र जसपाले ३ लाख २४ हजार ३१० मत पाएका छन् ।

जनमत पार्टी र एकीकृत समाजवादी थ्रेसहोल्डको सीमा कटाउन प्रयासरत छन् । आज बिहान १० बजेसम्मको मतगणना अनुसार जनमत पार्टीले २ लाख ६१ हजार २१५ र एकीकृत समाजवादीले २ लाख ५१ हजार ४७६ मत पाएको छ । ३ प्रतिशतको थ्रेसहोल्ड कटाउनासाथ भने ३ देखि ४ सिट पाउने देखिन्छ ।